ការជះទឹក ឬចាក់ទឹក ក្នុង​ពិធីបុណ្យចូលឆ្នាំប្រពណៃណីខ្មែរ​ ជាការខុសដែរ​​ទេ?

នៅសល់ប្រមាណជាងមួយសប្តាហ៍ទៀតប៉ុណ្ណោះ ពិធីបុណ្យចូលឆ្នាំថ្មីប្រពៃណីជាតិខ្មែរ នឹងឈានចូលមកដល់ ដែល​ក្នុង​ឱកាសបុណ្យ​ចូលឆ្នាំថ្មីនោះដែរ នៅតាមបណ្តាខេត្ត ឬទីតាំង​មួយចំនួន ប្រជាពលរដ្ឋ​បាន​នាំគ្នាលេងជះទឹក ឬចាក់ទឹកទៅគ្នាទៅវិញទៅមក។ តើ​​ការលេងជះទឹក ឬចាក់ទឹកនៅថ្ងៃបុណ្យចូលឆ្នាំថ្មីនោះជា ការខុសឬទេ?

លោក សឹង គា ម្ចាស់ផ្ទះជ័យភូមិ និងជាអ្នកជំនាញផ្នែកអរិយធម៌ខ្មែរ បានប្រាប់​ឱ្យដឹងថា នៅក្នុងពិធីចូលឆ្នាំថ្មី ប្រ​ពៃណីជាតិខ្មែរ ក្នុង​រដូវសង្ក្រាន្តនេះ មានការចែកពេលាច្បាស់លាស់ ដោយក្នុងនោះ រួមមាន​ព្រះមហាក្សត្រក៏ត្រូវស្រង់ទឹក ហើយ​​ព្រះសង្ឃក៏ត្រូវស្រង់ទឹកដែរ។

លោក សឹង គា បានបន្តថា ៖ «នៅរដូវចូលឆ្នាំថ្មីនេះ ក៏ឃើញមានការស្រង់ទឹកព្រះសង្ឃដែរ ខ្ញុំមិនលំអិតច្រើនទេ។ កា​រស្រង់ព្រះពុទ្ធរូបផង ការបាចសាចទឹកដាក់គ្នាផង ក៏កើតជា​ការត្រជាក់ចិត្ត ព្រោះចំរដូវក្តៅផងនោះ ក៏មានការច​ម្ល​ងវប្បធម៌ យកមកចែកចាយ បាចទឹក សាចទឹកដាក់គ្នា ក្រោយមកក៏ច្នៃប្រឌិត ដែលមានទុយោ កាំភ្លើងបាញ់ទឹកអីណឹ​ង ដែលសកម្មភាពនេះ​មិន​មានជាការខុសឆ្គងនោះទេ»។

លោកបាន​បន្ថែមទៀត​ថា ការបាចសាចទឹកនេះ មានការវិវត្តន៍តាមសម័យកាល ដែលកាលពីអតីតកាលមានការដាក់ទឹ​កក្នុងពាង ប្រើសម្រាប់ដងស្រោចកម្សាន្តជាមួយគ្នា តែសម័យកាលវិវត្តន៍ជឿនលឿន ក៏មានទុយោទឹកសម្រាប់ប្រើប្រា​ស់ តរៀងៗមកដល់បច្ចុប្បន្ននេះ។

អ្នកជំនាញផ្នែកអរិយធម៌ខ្មែរ ក៏បាន​បន្តទៀតថា ៖ «ការដែលខុសនោះ គឺ​កាំភ្លើងបាញ់ទឹក​ ដែល​បាញ់ខ្លាំងទៅចំភ្នែកគេ​ ធ្វើអោយគ្រោះថ្នាក់ ពេលកំពុងជិះម៉ូតូ ដែលធ្វើឱ្យប្រឡាក់​ខោអាវ ឬប៉ះអ្នកដែលត្រូវធ្វើដំណើរទៅ​វត្ត​ជាដើម។ អ្នកបាញ់ទឹក អ្នកបាចទឹក ត្រូវមានឥរិយាបថរបស់ខ្លួន ប្រជាពលរដ្ឋទៅវត្តមានចង្ហាន់ មានអាវហូលផាមួងត្រូវទឹកមិនបា​នទេ អាចគាត់មានទូរសព្ទ មានកាបូប យើងកុំជះ​ទឹក​ដាក់គាត់​»។

ការលេងទឹកទាំងនេះ គួរតែលេងនៅក្នុងវត្តអារ៉ាម កន្លែងស្រង់ព្រះ ឬការងូតទឹកជូនឪពុកម្តាយ ចាស់ព្រឹទ្ធាចារ្យ នៅក្នុ​ងគ្រួសារ ដើម្បីការកម្សាន្តសប្បាយរីករាយនៅក្នុងពេលបុណ្យចូលឆ្នាំថ្មីប្រពៃណីជាតិ ឬការដឹងគុណចំពោះអ្នកមា​នគុណ។​

សូមបញ្ជាក់ដែរថា​ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៤ នឹងប្រារព្ធឡើង​រយៈពេល​៤ថ្ងៃ ចាប់ពី​ថ្ងៃទី​១៣ ដល់ទី​១៦ ខែមេសា ដែល​រដ្ឋបាល​រាជធានីខេត្ត​នឹង​រៀប​ចំ​សង្រ្កាន្តឆ្នាំ​ថ្មីផងដែរ​។

រដ្ឋបាលខេត្តសៀមរាប បាន​​ជូនដំណឹង ស្តីពីការរៀបចំពិធីបុណ្យចូលឆ្នាំថ្មីប្រពៃណីជាតិ «សៀមរាបសង្ក្រាន្ត»​ រយៈពេល ៤ថ្ងៃ ចាប់ពីថ្ងៃទី១៣ ដល់ ថ្ងៃទី១៦ ខែមេសា ឆ្នាំ២០២៤ នៅសួនច្បារព្រះរាជដំណាក់ខេត្តសៀមរាប និងនៅស​ងខាងដងស្ទឹងសៀមរាប ចាប់ពីស្ពានអតីតមន្ទីរទេសចរណ៍ខេត្ត រហូតដល់ស្ពានវត្តដំណាក់។

នៅក្នុងព្រឹត្តិការណ៍នេះ នឹងមានកម្មវិធី កម្សាន្តសប្បាយជាច្រើន រួមមាន៖ ការលេងល្បែងប្រជាប្រិយខ្មែរ ការជិះទូកលេងតាមដងស្ទឹង ការវាយកូន ហ្គោលសៀមរាបសង្ក្រាន្ត ការពិព័រណ៍ម្ហូបអាហារ ការទស្សនាផ្សារបណ្តែតទឹក និងការប្រគំតន្ត្រីនាពេលរាត្រី។

ចំណែករដ្ឋបាលរាជធានីភ្នំពេញ ​ក៏នឹងរៀបចំ «សង្ក្រាន្ដវត្តភ្នំ» នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ រយៈពេល៤ថ្ងៃផងដែរ​​ គឺចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ វេលាម៉ោង ៨:០០ព្រឹក ដល់ម៉ោង ២០:០០យប់ ។

យោងតាម​សេចក្តីជូនដំណឹង​របស់រដ្ឋបាលរាជធានីភ្នំពេញ បានឱ្យដឹងថា នៅក្នុងសង្ក្រាន្តនេះមានការរៀបចំកម្មវិធីបែបប្រពៃណីជាតិ និងកម្សាន្តសប្បាយជាច្រើនដូចជា៖ កម្មវិធីទទួលទេវតាឆ្នាំថ្មី ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្ដែងសិល្បៈ របាំប្រពៃណី របាំបុរាណ ល្បែងប្រជាប្រិយជាតិ (ទាញព្រ័ត បោះអង្គញ់ វាយក្អម ចោលឈូង លាក់កន្សែង ចាប់កូនខ្លែង និងដណ្តើមស្លឹកឈើ) ប្រគំតន្ត្រីបុរាណ-សម័យ រាំលេងកម្សាន្ត តាំងបង្ហាញគំនូរបុរាណ និង វត្ថុសិល្បៈវប្បធម៌។

រដ្ឋបាលរាជធានីភ្នំពេញ​ក៏បាន​អំពាវនាវដល់​ប្រជាពលរដ្ឋគ្រប់មជ្ឈដ្ឋានអញ្ជើញមកចូលរួមកម្សាន្តសប្បាយនៅសង្គ្រា​ន្ត​វត្តភ្នំឱ្យបានច្រើនកុះករក្រោមម្លប់សន្តិភាពដ៏ត្រជាក់ត្រជុំ៕